والكوبري كله من أوله لآخره بدون عربيات هو عبارة عن ناس مصريين بيقتلوا في بعض

حلمت خير إني مع والدتي في الشارع بعد الفجر وقت طلوع النور وفي طريق صلاح سالم عند كوبري عريض جدا والكوبري كله من أوله لآخره بدون عربيات هو عبارة عن ناس مصريين بيقتلوا في بعض وفي دم وهرج ومرج جامد جدا وأنا ووالدتي كنا خايفين عشان لازم الناس تعدي من الطريق ده عشان تنجو وأي حد هيعدي لازم يتصاب أو يموت من كتر الناس ماهي بتقتل في بعض.. بصيت لقيت تاكسي صغير راكبه شاب من هيئته انه يهودي يعني شعره من الجانبين ضفاير ولابس طاقية على شعره زي طواقي اليهود بس لونها أبيض شبه بتاعة المسلمين وهو كان لابس أبيض ولون بشرته بيضا وصغير في السن (العشرينات).. ركبنا أنا ووالدتي بسرعة عشان يمشي بينا من طريق الكوبري ولما ركبنا استغربت ماما انها ماسألتش السواق أو استغربت انه يهودي فقولت لنفسي يمكن هي مش عارفة شكلهم بس أنا عارفة مظهرهم عشان بشوف فيديوهات ليهم كتير على اليوتيوب وبعدين هو جه يكلمها يعرفها بنفسه قولتله استنى انت انا هقولها قولتلها ماما السواق ده يهودي مصري وأنا مبتسمة وبصوت عالي.. مشينا بعدها بالتاكسي وسط الناس اللي بتقتل بعض والسواق ده كان بيعدي من وسطهم بيتجنبهم وماكنتش عارفة اللي بيتخانقوا دول مين محتارة بين ان الشعب ماسك في بعضه أو انهم مخبرين أو أمن بيتخانقوا مع مدنيين بس كان جسمهم كبير وقوي فقولت دول تبع الأمن، ومفروض كانوا بيفتشوا العربيات وأي عربية كانوا بينزلوا الناس منها ويقتلوهم بس الحمد لله السواق عدى بينا وسطهم وقولت يمكن عشان لاقونا ستات.. بعدين وصلنا لنفق أو ممر كبير مفروض ناس كتير متجمعة عشان تعدي منه وتروح بيوتها كانوا ماشيين أفواج ورا بعض نزلت من التاكسي ومشيت مع الناس ناحية النفق لقيت واحدة اعرفها اسمها رحاب كانت لابسة تي شيرت أحمر وجينز وغير محجبة وموطية راسها بدون مكياج ومرهقة وواحد من اللي بيتخانقوا بيزعقلها وبيقولها كله منك انتي يا بوز... انتي اللي بلغتي عننا.. وقتها كانت الشمس بدأت تطلع ودخلت النفق لقيته واسع ومضيء وفيه غرف لونها أبيض لقيت ماما مش معايا جريت برا روحت اجيبها لاقيها واقفة مع سواق التاكسي قولتلها يلا بسرعة فسلمت عليه وقالتلي كنت بتكلم معاه.. خدتها من ايديها وطلعنا ممشى فاضي واسع زي مخصص للعجل ومفروض رايحين على النفق والدنيا كانت هديت عن الأول.. أرجو تفسير الرؤيا وجزاكم الله كل خير